ఢిల్లీ వీధుల్లో కొత్త పోరు.. సీజేపీకి పోటీగా ఢిల్లీలో ‘లాల్ హిట్‌ జనతా పార్టీ’

దేశ రాజధాని ఢిల్లీలో కొత్త రాజకీయ సమీకరణాలు మొదలయ్యాయి. కేంద్ర ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ ‘కాక్‌రోచ్ జనతా పార్టీ’ (సీజేపీ) చేపట్టిన నిరసనలకు వ్యతిరేకంగా మరో కొత్త గ్రూప్ ఆవిర్భవించింది. ‘లాల్ హిట్‌ జనతా పార్టీ’ పేరుతో ఏర్పడిన ఈ బృందం, సీజీపీ విధానాలను తీవ్రంగా వ్యతిరేకిస్తోంది. ప్రజాస్వామ్య పరిరక్షణే తమ లక్ష్యమని ఈ పార్టీ ప్రకటించింది.

 నిన్న‌ ఢిల్లీలోని మాళవియా స్మృతి భవన్‌లో ‘లాల్ హిట్‌ జనతా పార్టీ’ తమ తొలి సభ్యత్వ సమావేశాన్ని నిర్వహించింది. ఈ కార్యక్రమానికి పార్టీ చీఫ్ అయాన్ భట్నాగర్ నేతృత్వం వహించారు. ఈ సందర్భంగా ఆయన మాట్లాడుతూ.. తమ భవిష్యత్ కార్యాచరణను నిర్ణయించుకోవడానికే ఈ సమావేశం ఏర్పాటు చేశామని తెలిపారు. 

అతి తక్కువ సమయంలో కూడా తాము పెద్ద సంఖ్యలో ప్రజలను సమీకరించగలమని నిరూపించడమే ఈ సమావేశం ఉద్దేశమని ఆయన స్పష్టం చేశారు. దసరా పండుగ చెడుపై మంచి సాధించిన విజయానికి ప్రతీక అని, ప్రజలు ఇకపై సోషల్ మీడియాలో చర్చలకే పరిమితం కాకుండా, ప్రజాస్వామ్య పరిరక్షణ కోసం వీధుల్లోకి రావాలని పిలుపునిచ్చారు.

సీజేపీ చేపట్టిన నిరసనల వల్ల దేశంలోని రాజ్యాంగబద్ధ సంస్థల గౌరవానికి భంగం కలుగుతోందని అయాన్ భట్నాగర్ ఆరోపించారు. వారి ఆందోళనల కారణంగా వ్యాపారాలకు తీవ్ర నష్టం వాటిల్లుతోందని, పోలీసు సిబ్బందితోనూ ఆందోళనకారులు దురుసుగా ప్రవర్తిస్తున్నారని విమర్శించారు. 

ముఖ్యంగా పండుగల సీజన్‌లో కన్నాట్ ప్లేస్ వంటి ప్రధాన వాణిజ్య ప్రాంతాల్లో నిరసనలు చేపట్టడం వల్ల వ్యాపారులు తీవ్రంగా నష్టపోతున్నారని ఆవేదన వ్యక్తం చేశారు. ఇలాంటి చర్యలను తాము ఎట్టిపరిస్థితుల్లోనూ సహించబోమని హెచ్చరించారు.

ఈ సమావేశంలో పాల్గొన్న పలువురు వక్తలు కూడా సీజీపీ నిరసనలను తప్పుబట్టారు. రాజ్యాంగ సంస్థలకు, ప్రభుత్వానికి మద్దతుగా నిలవాల్సిన ఆవశ్యకతను వారు నొక్కి చెప్పారు. ప్రజాస్వామ్య విలువలను కాపాడటానికే ‘లాల్ హిట్‌ జనతా పార్టీ’ని ఏర్పాటు చేశామని, దేశ ప్రయోజనాలకు విఘాతం కలిగించే ఏ చర్యనైనా అడ్డుకుంటామని వారు స్పష్టం చేశారు.